ಆಶಾಕಿರಣ

ನಿಂತ ನೆಲ ಕುಸಿದು
ಕಷ್ಟಸಾಗರದಲಿ ತೇಲಿಬಿದ್ದು
ಅತ್ತಿತ್ತ ಅಲುಗಿ, ಎತ್ತಲೋ ಸಾಗುವ
ಹುಟ್ಟು ಹಾಕಿದರೂ ಹಿಮ್ಮೆಟ್ಟುವ
ದೋಣಿಯಲಿ ಕೈಬಿಟ್ಟು
ನಿಂತು ನೋಡಿದರೆ
ಎಲ್ಲೆಲ್ಲೂ ನೀರು ಉಪ್ಪುಪ್ಪು ನೀರು

ಹಣೆಗೆ ಕೈ ಹಚ್ಚಿದಾಗ
ಕಿರಿದಾದ ಕಣ್ಣೆವೆಗಳ ನಡುವೆ
ಎಲ್ಲಿಂದಲೋ ತೂರಿಬರುವ
ಒಂದೇ ಒಂದು ಕಿರಣ
ಇದ್ದದ್ದನ್ನು ಕ್ಷಣಕಾಲ ಮರೆಮಾಚುವ
ಅದು ಮರೀಚಿಕೆಯಾಗಿದ್ದರೂ
ಅದೇ ಕಿರಣ
ಆ ಒಂದೇ ಕಿರಣ ಸಾಕು
ಆಶಾಕಿರಣವದು

ಚುಟುಕು

ಬಾಳೊಂದು ಕನಸು
ಆದರಿದು ಸೊಗಸು
ಆಗಬೇಕಾದರೆ ಎಲ್ಲರನು ಪ್ರೀತಿಸು
ದೂಷಿಸುವದ ದ್ವೇಷಿಸು
ತಪ್ಪಿತರನು ಮನ್ನಿಸು
ನೀನು ನಕ್ಕು
ಎಲ್ಲರನು ನಗಿಸು

ಪ್ರಶ್ನೆ

ಎಲ್ಲೆಲ್ಲೂ ಹಸಿರಾಗಿ
ಅಲ್ಲಲ್ಲಿ ಕೆಸರಾಗಿ ಕಾಣುತಿದೆ ಭುವಿಯು
ಹಸಿರು ಕೆಸರಲ್ಲಿ
ಪಸರಿಸಿದ ತರುವೊಂದು
ಸುರಿಸಿದ ಸುಮಗಳಿಗೆ
ಸುತ್ತುತಿದೆ ದುಂಬಿಯು

ಗುಡ ಗುಡನೆ ಗುಡುಗುವ
ಮೋಡವ ಕರೆಯಲು
ಥಕ ಥಕನೆ ಕುಣಿಯುತಿದೆ
ಮೋಡಿಯ ನವಿಲು
ಪಕ್ಕದಲಿ ಬಳಕುತ್ತ
ಥಳಕುತ್ತ ಪುಟಿಯುತ್ತ
ಅಲೆಯಾಗಿ ಸೆಲೆಯಾಗಿ
ಹರಿಯುತಿದೆ ಹೊನಲು

ವರುಷಗಳ ನಂತರ
ಈ ಕವಿತೆ ಓದಿ
ಪುಟಾಣಿ ಮಗುವೊಂದು
ತಂದೆಗೆ ಹೇಳುತಿತ್ತು
ಎಲ್ಲೆಲ್ಲೂ ಹಸಿರಿತ್ತು
ಅಲ್ಲಲ್ಲಿ ಕೆಸರಿತ್ತು
ಕೆಸರಲ್ಲಿ ಪಸರಿಸಿದ
ತರುವಿಗೆ ದುಂಬಿಯಿತ್ತು
ನವಿಲಿತ್ತು ನದಿಯಿತ್ತು
ನೀವು ಉಳಿಸಿದ್ದರೆ
ನಾನೂ ನೋಡಬಹುದಿತ್ತು

ಸಾರಾಂಶ

ಬರಿದಾಗಿ ಧರೆಗೆ ಬಂದು
ಪರಿ ಪರಿಯ ಸಂಸ್ಕಾರ ದೊರೆತು
ಹೊಸದಾದ ವ್ಯಕ್ತಿತ್ವವೊಂದು
ಅರಿಯದೆಯೆ ತಾನಾಗಿ ಬಂತು

ಸರಿ ತಪ್ಪುಗಳಲಿ ಸಿಕ್ಕಿ
ಸಿರಿ ಯಶಗಳ ಹಿಂದೋಡಿ
ಸಿಕ್ಕಿದರೂ ದುಃಖಪಡುವದು
ಅರಿಯದೆಯೆ ತಾನಾಗಿ ಬಂತು

ಬರಿದಾಗಿ ಧರೆಗೆ ಬಂದು
ಬರಿದಾಗಿ ಹೋಗುವೆವೆಂದು
ಅರಿಯದೆಯ ಆರಂಭ ಕೊನೆಯ
ನಡು ನಡುವೆ ಬಡಿದಾಡಿ
ಕಡೆಗೆ ತಡವರಿಸುವುದೆಂತು?