ಗಿರಿಯನೇರಿ ಕರೆವ ಮುಗಿಲ
ತೆರೆಯ ಸರಿಸಿ ಇಣುಕುವಾಸೆ
ಬನದ ನಡುವೆ ಹರಿವ ಹೊನಲ
ಜೊತೆಗೆ ಓಡಿ ನಲಿಯುವಾಸೆ
ಬಾನ ಮಳೆಯ ಹನಿಯ ಜೊತೆಗೆ
ಎಲೆಯ ಮೇಲೆ ಜಾರುವಾಸೆ
ಕರೆವ ಸಾಗರ ತೆರೆಯನೆದುರಿಸಿ
ಅಂಚ ಸೂರ್ಯನ ತಲುಪುವಾಸೆ
ಗಾಳಿ ತಾಳಕೆ ಬಾಗೊ ತೆನೆಯ
ಕಾಳ ಜೊತೆಗೆ ಬಾಳುವಾಸೆ
ಇರುಳ ತಾರೆಗಳನೆಲ್ಲ ಪೋಣಿಸಿ
ಧರೆಯ ಮುಡಿಗೆ ಮುಡಿಸುವಾಸೆ
ಕರಿಯ ಕತ್ತಲೆ ತೆರೆಯ ಸರಿಸಿ
ಮರೆಯ ರವಿಯ ತರುವ ಆಸೆ
ನಾದದಿಂದ ಹೊಮ್ಮಿದಂಥ
ಗೀತವೊಂದ ಬರೆಯುವಾಸೆ
ಗೀತ ಭಾವದಲ್ಲಿ ತೇಲಿ
ಸೃಷ್ಟಿಲಯದಿ ಸೇರುವಾಸೆ
೨೧/ನವೆಂಬರ್/೯೮
Subscribe to:
Post Comments (Atom)
No comments:
Post a Comment